ПРВА ТРЕНИНГ-ОБУКА ЗА НАСТАВНИЦИ ВО РАМКИТЕ НА ПРОЕКТОТ „РЕШАВАЊЕ МЕДИЦИНСКИ МИСТЕРИИ СО МАТЕМАТИКА“ ВО ЕРАЗМУС+
СОУ „Гимназија Кочо Рацин“ е учесник во проектот “Solving Medical Mysteries with Math“ во Програмата Еразмус+, во клучната акција – стратешко партнерство за размена на добри практики, заедно со три други средни училишта од: Шпанија, Португалија и Италија.
Во текот на проектниот циклус, од септември 2019 до август 2021 година, ќе се реализираат активности со ученици и наставници чија цел ќе биде развивање на иновативни методи за подобрување на клучните компетенции по математика и наука кај учениците, јакнење на позитивни ставови за здрав начин на живот, охрабрување на учениците за кариерен развој во математиката и медицината, како и зајакнување на наставничката професија.
Во периодот од 4 до 9 ноември 2019 година, се реализираше првата тренинг-обука за наставници во Малага, Шпанија. На овој настан присуствуваа двајца наставници од нашето училиште, а целта на истиот беше разгледување на проектната апликација и распределба на одговорности и задачи. Во врска со темата на проектот, сите училишта ги презентираа своите добри практики во СТЕАМ. Учесниците дискутираа за имплементација на сите следни активности со ученици според проектната апликација.
Преку прошетки и еднодневни екскурзии, учесниците се запознаа со културата и традицијата на Малага и околните места, што претставуваше особено задоволство за сите.
Во наредниот период следи тренинг-обука за ученици во Италија.
Одговорни наставници: Мариче Лазаровска и Христина Леова