ACCESS ВЕЛЕС ВО ПОСЕТА НА ACCESS РАДОВИШ
На 10 декември оваа година, учениците од Access – Велес, беа во работна посета на групата од Access – Радовиш.
Access-програмата оваа учебна година се одвива во пет града: Радовиш, Велес, Кочани, Пробиштип и Свети Николе. Покрај многубројните онлајн средби на учениците од сите пет града во минатата учебна година, ова е прва средба во живо, на која учениците од Радовиш и Велес имаа можност да се запознаат, да разменат искуства и мислења, да развијат нови пријателства.
Домаќините ја пречекаа групата од Велес во Гимназијата „Коста Сусинов“, а по кратката обиколка следуваше прошетка низ градот – домаќин. Најпрвин беше посетена црквата „Света Троица“, каде учениците беа поделени во групи и учествуваа во квиз на знаење со податоци за црквата. Рутата продолжи по булеварот и групата продолжи кон центарот на градот каде што повторно имаа квиз на знаење, овој пат со податоци за градот Радовиш и на крај беше организирана посета на градската библиотека, каде учениците дознаа повеќе за самата библиотека, како и за животот и делото на познатата оперска пејачка со потекло од Радовиш, Милка Ефтимова.
Учениците имаа можност да го пробаат и познатиот радовишки сомун.
Со позитивни импресии, Access-групата од Велес замина од Радовиш, подготвувајќи се да го возврати гостопримството во периодот што следи.
